United Nations General Assembly, New York-a Nilaini-a neihah US-in Cuba laka hrekna hrang hrang an siam, Cuba hmasawnna neih theihna dangtu nia sawi tihtawp rawtna thlen chu India in a thlawp. General Assembly-ah hian ram 193 an tel thei a, rawtna thlen hi a thlawp lamah ram 130-in vote in, ram 17-in an thlawp lo a, ram 25 a hai thung.
UN-a India Permanent Mission Counsellor Soumya Nair chuan thuchhuah siamin, India-in Assembly-a tel ram zawng zawngte chu he rawtna hi pawm tura a ngen bakah, he rawtna siam chu awmze neia hmang thuai turin a duh tih a sawi. Rawtnate a hlawhtlin theihna tur hian UN charter leh International law milin leh pawl kalphungin a phut anga kal mai chu India duh dan a nih thu a tarlang.
Nair chuan ram hrang hrang intelkhawmna pawl kaltlanga khawvel harsatna tawh sutkian kawnga hmalaknate leh a hlawhtlin theihna turin, diplomacy leh inbiaknate UN charter mila kalpui chu India chuan a thlawp tlat thu a sawi. "India chuan Cuba mipuiten nun chhenfakawm an neih theihna turrin he hrekna siam hi a rang thei anga hlih chu thinlung takin a thlawp a ni. Cuba-in khawvel huap thawh hona leh hmasawnna a neih pumhlum chu India duh dan a ni," a ti.
Cuba leh US inkar hi kum tam tak chhung buai tawhin, kum1959-a Fidel Castro kaihhruaiin US thlawp sorkar a paih thlak hnua Soviet Union a zawm hnu khan politic, economy, leh pawmdan in ang lote avangin an lo buai ṭan tawh a ni. Hemi avang hian US chuan Cuba-a Castro kaihhruai sorkar beihna a tan hrekna siamin, Cuba mipuite chu sum leh pai harsatna leh tuialhthei indaih lohnaten tlakbuakin, rethei takin an awm phah a ni.
