Poland-in China aiin India thawhpuina ngai pawimawh

Poland prime minister Donald Tusk chuan tun hnaia India a rawn tlawh hnuah, India nena economy leh defence huanga thuk zawka thawh dunna tur 'strategic partnership' siam chu China nena inremna siam aiin an ngai pawimawh zawk tih a tarlang.

Russia-Ukraine indona thleng meka an ṭan lam inang lo vang te, an inkar sumdawn tawnna intluktlang lo vang tein Poland leh China inlaichinna hi a ṭha lo chho a ni. Hei vang hian India nena inlaichinna leh thawh dunna ṭha neih chu an ngai pawimawh a ni. Kum 2024-a prime minister Narendra Modi-an Poland a tlawh ṭum a ram hnih thawh dunna 'stratagic partnership' a hlan kai a nih hnuah India leh Poland inkar hi a ṭha chho hle a, huang hrang hrangah thawh dunna pawh an zauh zui zel a ni.

Poland PM Tusk hian October 21-23 khan India a rawn tlawh a, PM Modi nen thuchhuah inṭawm siamin, ram pahnih insumdawn tawnna chu kum 2030 hmaa a let hniha tihpun an remti ve ve tih an tarlang. Ram pahnih insumdawn tawnna hlut zawng hi nikum 2025 khan Euro tld 6.3 a tling a ni. China nena insumdawn tawnna intluktlang lo tak neih reng ai chuan India nena thawh dun hi a hlawk thlak zawk nia an hriat thu Polish Institute of International Affairs in October 27-a zirchianna a tihchhuahah an lo tarlang tawh bawk.