Election Commission of India (ECI) chuan nimin khan Bihar assembly inthlan neih hun tur a puang. Inthlan hi thawh hnihah neih a ni dawn a, November 6 leh 11 ah vote thlak a ni ang. Hei hi Special Intensive Revision (SIR) neih hnua assembly inthlan an neihna hmasa ber tur a ni. Vote tla hi November 14-ah chhiarin result puan nghal a ni ang.
Member 243 awmna Bihar state assembly term kal mek hi November 22 hian a tawp dawn a ni. Seat 243 zingah SC reserved seat 38 leh ST reserved seat pahnih a awm. Vote nei mi vaibelchhe 7.42 awmin, an zinga vbc 3.92 chu mipa an ni a, hmeichhia vbc 3.5 an awm bawk. Vote nei zinga nuai 14 te hi vote nei thar, assembly inthlana vote thlak vawi khatna tur an ni. Kum 100 chunglam hi voter14,000 an awm bawk.
Vote thlakna tur polling station 90,712 a awm a, chawh rualin polling booth pakhatah voter 1,200 vel zel awm ang an ni. Inthlanna dik leh felfai a awm theihna atan polling state zawng zawngah webcasting hman a ni dawn a, EVM ballot paper-ah candidate-te thlalak chu colour-in dah tel vek a ni dawn bawk tih CEC Gyanesh Kumar chuan a sawi.
Inthlan thawh khatna, November 6-ah constituency 121-ah vote thlak a ni ang a, a thawh hnihna November 11-ah constituency 122-ah vote thlak a ni ang.
Bihar-a electoral roll ennawnna, SIR kalpuina hnuaiah khan voter list aṭangin mi nuai 68.5 paih an ni a, dah thar mi nuai 21.5 an awm thung. Voter list aṭanga paih an tam lutuk hi eptu party hrang hrangte chuan an sawisel nasa hle a, EC-in SIR a kalpui dan chungchang hi Supreme Court-ah pawh khin mek a ni bawk.
Kum 2020 assembly inthlan kha thawh thuma neih niin, Covid-19 hri len lai a nih avangin vote a tla ṭha lo hle. Vote tla kha 56.93% chauh a ni pha. 2020 inthlanah khan party malah RJD chu seat la hnem ber niin seat 75 an la a ni.
