Darjeeling leimina thi 24 tling tawh

Darjeeling district, West Bengal-a Inrinni liam ta zana leimin vanga thi zat chu mi 24 an tling tawh tih fianfiah a ni. Chhanchhuah hna thawktute chuan nimin khan beihpui thlak chhunzawm mah se, leiminin a thlen hnawmhnawk vangin hmalak a harsat thu an tarlang.

Chhiatna thleng vangin mi eng emaw zat chu chin hriat lohin an la awm a, khualzin eng emaw zat tangkhang an awm bawk niin thuneitute chuan an tarlang. Chhiatna thleng dinhmun a la khirhkhan zel avangin state chief minister Mamata Banerjee chuan nimin khan high-level meeting a ko a, nimin vek khan chhiatna thlenna thlithlai turin a hmunah a tlawh.

Inrinni liam taa ruahsur nasa vang khan West Bengal-ah hian leimin bakah state hmar lamah tuilian nasa tak a thleng a, CM Banerjee chuan tuilian vanga thi chhungte hnenah zangnadawmna Rs nuai 5 pek a nih tur thu leh, thi chhungte chu special homeguard hna pek an ni dawn tih puangin, tuilian chu mihring siam chawp chhiatna thleng a nih thu sawi lang bawk.

Leiminna hmunah hian district thuneitute chu Gorkhaland Territorial Administration (GTA) leh tualchhung NGO-te nen thawk hoin harsatna tawkte chhawmdawlna tur relief camp an siam a, camp-ah hian ei tur, blanket, damdawi, leh tui inturte an sem. India Meteorological Department (IMD) chuan chhiatna thlenna huam chhungah hian ruah nasa taka sur thei a la ni tih a tarlang.