Defence minister Rajnath Singh Australia-ah zin dawn

Union defence minister Rajnath Singh chu October 9 khian ni hnih cham turin Australia-ah a zin dawn. Singh hi Australia defence minister leh deputy prime miniser Richard Marles-a'n a sawm anga zin tur a ni tih Ministry of defence chuan an tarlang.

Rajnath Singh-a'n Australia a tlawh tur hi India-Australia thawh dunna siam Comprehensive Strategic Partnership (CSP) kum nga tlinna pual niin, Australia hi kum 2014-a an sorkar hnua a tlawh vawikhatna tur a ni bawk.

Singh hian Australia defence minister chu defence huanga thawh dunna tur leh huang zau zawka thawh dun theihna tur chungchangte a sawipui ang. Hei bakah Sydney-a business round-table neih tur a kaihruai nghal dawn a, ram pahnih aṭangin industry hruaitu lian an tel dawn a ni. A cham chhung hian thawh dunna pathum - information sharing, maritime domain, leh joint activities-te tichak thei tur atan inremna ziah beisei a ni.