India rama Covid-19 hri a len thar leh hnuah he hri vanga thi hi mi 108 an tling tawh. Thi zinga a tam zawk hi natna benvawn lo nei sa nia sawi an ni.
Thawhṭanni khan Covid-19 vangin mi 11 an thi a, hri a len thar leh hnuah ni khat a thi an tam ber ni a ni. Thi zinga pasarih chu Kerala state ami niin Delhi, Maharashtra, Chhattisgarh leh Madhya Pradesh-ah mi pakhat ṭheuh an thi bawk. Kerala-a thi mi psarihte hi kum 60 chunglam vek niin, natna dang nei sa an ni bawk.
Kerala hi Covid-19 hri kai awm tamna ber state niin, hri kai mek hi 1,920 an ni. Gujarat-ah 1,433, Delhi-ah 649 leh Maharashtra-ah 540 an awm mek bawk.
Sorkar data in a tarlan danin, kumin January 1 aṭang khan Covid hri kai hmuh chhuah tawh hi 13,604 an awm tawh a, a tam zawk erawh enkawl dam an ni tawh thung. Hri kai zinga thihpui hi 0.79% an ni a, mi thiamte chuan chiai phahna tur a awm lo thu an sawi.
Official chuan tun hnaiah hri kai hmuh chhuah thar hi an pung chho viau nain, hospital-a dah luh ngai leh thihpui zat erawh a hniam hle tih a sawi. Hri kai tam zawk hian an la na lo a, a tam zawk chu damdawi-in pan ngai loa in lama inenkawl an ni. Hemi rual hian official-te chuan mipui chu fimkhur tura chahin, damdawi-in hrang hrangte pawh oxygen, isolation bed, ventilator leh damdawi mamawhte inbuatsaih ṭha turin a chah.
