AI chesuala thi ruang 135 DNA finfiah; Ruang 101 an chhungte hnenah hlan tawh

Ahmedabad-a Air India thlawhtheihna chesuala thi zinga ruang 135 DNA chu finfiah tawh niin, ruang 101 chu an chhungte hnenah thawn fel a nih tawh thu Ahmedabad Civil Hospital-a medical superintendent Rakesh Joshi chuan nimin Thawhlehni khan a sawi.

Thuneitute chuan chhiatna thlenga thi ruang fianfiah nana DNA test neih hi an kalpui chhunzawm zel thu an tarlang bawk.

Dr Joshi chuan chhiatna thleng vanga thi, DNA finfiah hna chu vawiin, Nilaini zing lamah zawhfel hman beisei a nih thu leh an chhungte hnenah thawn kim hman rin a nih thu a tarlang tel bawk. June 12-a Air India thlawhtheihna chetsualnaah hian a chuang mi 242 zinga 241 te an thi a, a tlakna hmunah hian mi 29 an thi bawk. Lei lama thi zingah hian MBBS zirlai panga an tel ve bawk a ni.

Mitthi ruang finfiah tawh zingah Ahmedabad -a mi tam ber in mi 30 an ni a, Vadodara mi 13, Kheda mi 10, Anand aṭangin pakua, Mehsan leh Gandinagar mi panga ve ve, Bharuch mi pali, Surat mi pathum, Aravalli mi pahnih bakah Botad, Junagadh, Amreli, Mahisagar, Bhavnagar, Gir Somnath, Nadiad, leh Rajkot mi pakhat ṭheuh DNA te finfiah a ni tawh.

Amedabad-a chetsualna thleng hi Air India Boeing 787-8 Dreamliner, kum 2009-a aircraft huanga a service ṭan hnua chhiatna rapthlak a tawh hmasakna ber a ni. Kum 2024-a khan Boeing-a kum 30 chuang lo thawk tawh leh quality manager ṭhin, John Barnet chuan Boeing Dreamliner programme-ah a himna lam tehna ṭha tawk lo a awm thu a lo puang chhuak tawh a, mahse hmalakna erawh a awm zui lo. Tun ṭuma chetsualna thlen hma pawh hian Boeing thlawhtheihna hian chetsualna rapthlak tak tak an lo tawk tawh a ni. Barnett hi thil fel lo awm a puan chhuah hnu lawk hian, thih dan mak takin a thi zui bawk a ni. Heng a nih vang hian thlawhtheihna company lamah mipui tam tak rin lohna a nasa chho zual hle bawk.

Air India hian flight AI 171 chetsualnaah hian India-a non-life insurance major an tih mai, General Insurance Corporation of India (GIC Re) hnuaiah hian chhiatna thleng vang hian insurance Rs tld 39.4 a tel thei dawn a, hei hian ramchhunga insurance claim tam ber record a siam thei dawn a ni.