Congress party chuan prime minister Narendra Modi chu press conference neih dan phung pangngai ang nei loa a tlanchhiat reng chhan zawtin, phuahchawp lo 'undoctored' press conference nei tura an phût thu nimin khan an tarlang.
Congress general secretary in-charge communications Jairam Ramesh chuan PM Modi chu PM office a luah kum 11 a tlinna puala a vawi khatna atana 'undoctored' press conference nei turin an phût tih a sawi a ni. "Eng vangin nge Prime Minister hi a tlanchhiat reng? Zawhna leh chhanna buatsaih lawk a, a lo zawttu tur thlang tur hian hun a mamawh em ni?"a ti. Congress beihna hi BJP emaw, sorkar lam emaw chuan an la chhang lo.
Prime Minister hi media mite a hmuh dawnah pawh zawhna leh chhanna pawh lo siam lawk sa zelah Congress chuan puhin, hetianga buatsaih lawk loha press meet nei ngam lohah an puh a ni. Ramesh chuan ram hrang hrang hruaitute chuan siamchawp ni lo press conference hi an nei reng a, hetih lai hian Modi chuan kum 11 chhungin vawi khat pawh a la nei ve lo, a ti. Kum 2014-a PM atana lak luh a nih aṭang khan Modi hian press conference hi a la nei lo a ni.
Modi hi nikum June 9 khan a term thumna atan Prime Minister atan lak luh niin, nimin kha a kaihhruai National Democratic Alliance (NDA) term thumna in kum hnih a tlinna a ni a, PM office a luah tirh aṭangin kum 11 a tling tawh bawk.
