India chuan Pahalgam-a firfiak pawl beihna thlen hnuah leh Pakistan nena an inep reng hnuah venhimna lam tih hmasawnna tur hrang hrang a kalpui mek. A hmalakna tih hlawhtlinna pakhat atan Indian Navy leh European Union Naval Force(EUNAVFOR) chuan tuipuiah a huhoa nunchan zirna an neih thuai tur thu a sawi.

Tuipuia nunchan zirna an neih turah hian EUNAVFOR aṭangin ESPS Reina Sofia leh ITS Antonio Marceglia an chhawp chhuak dawn a, Indian Navy indo lawng leh indo thlawhtheihnate an chhawp chhuak dawn bawk. Nunchan zirna hi Indian Ocean huam chhunga indona pangngai ni lo hmanga buaina awm ṭhin, dan loa sumdawnna leh lawng suamhmangte lo do letna kawnga thawh hona ṭha a awm theih dan tur ruahmanna atana neih a ni dawn tih an tarlang.

Nunchan zirna hi prime minister Narendra Modi leh European Union president Ursula von der Leyen-ten khawvel puma vemhimna leh ralmuanna a awm theihna tur atana theih tawp chhuah an duh thu an lo sawi tawh hlawhtlinna tur kawng khat tur a ni bawk.

EUNAVFOR lam hi Admiral Davide Da Pozzo in a kaihruai dawn a, Indian Navy-a Western Naval Command Chief Staff Officer (Operations), Rear Admiral Vidyadhar Harke chu thawh ho dan tur chungchang pawh a lo sawipui tawh a ni.

Southern Air Command hotu thar Air Marshal Manish Khanna

Air Marshal Manish Khanna chuan Pathianni liam ta khan Thiruvananthapuram-a Southern Air Command-ah Air Officer Commanding-in-Chief hna a zawm thar. Khanna hian chawimawina -Ati Vishisht Seva Medal (AVSM) leh Vayu Sena Medal (VM) te a lo dawng tawh a ni. Indian Air Force hnuaia fighter stream hi December 6, 1986 khan a zawm ṭan a ni.

Manish Khanna hi category 'A' qualified Flying Insructor a nih bakah National Defence Academy alumni niin, Defence Services Staff College, College of Air Warfare leh National Defence College, aṭanga inzir chhuak a ni bawk. Khanna hian darkar 4,000 chuang flying experience a nei tawh a, tuna a nihna thar a chelh hma hian Senior Air Staff Officer (SASO) hna chu South Western Command (SWAC) ah a thawk ṭhin bawk.