Kharge-an NE state tuilian tuarte chhawmdawlna pe turin ngen

Congress party president Mallikarjun Kharge chuan nimin khan prime minister Narendra Modi kaihhruai sorkar laipui chu tun hnaia ruahsur nasa avanga tuilian tuar, hmarchhak bial chhunga state ṭhenkhatte tan chhawmdawlna pe turin a ngen.

Kharge chuan PM Modi chu tulian tuarte hnenah PM CARES Fund aṭanga chhawmdawlna pe turin a ngen a,fund-ah hian audit lohin vaibelchhe tam tak sum dah a nih thu a tarlang tel bawk.

Congress President chuan kum 2016 daih tawhah khan PM hian Assam chu tuilian thlen lohna hmuna siam a intiam thu sawi langin, tunah tuilian an tawrh leh mek si avang hian BJP rorelna Assam chu a phatsan a ni, a ti. Hetih laiin Congress party-a thawktu leh hruaitute chuan mipuite chhawmdawl nan an theih ang ang an tih tur thu a sawi lang tel nghal a ni.

Hmarchhak state hrang hranga ruahtui tla nasa vanga Assam, Meghalaya, Manipur, Sikkim leh Arunachal Pradesh ten an tawrh nasat thu sawi langin, Kharge chuan Assam-ah chuan tuilian tuartu mi tam tak hmun him lama sawnchhuah an ngaih thu a sawi. Tuilian tuar zinga lui kam hnaih leh hmun hniam lama chengte chuan harsatna an la tawh belh zel thei dawn bawk niin a tarlang bawk.