India leh European Union (EU) chuan nimin khan Delhi-ah Trade and Technology Council (TTC) meeting vawi hnihna an nei.
TTC meeting ṭum hnihnaah hian ram pahnihte chuan thawh dunna tur hrang hrang tih zauhna turte an sawi ho. TTC hi India leh EU ṭangkawpin 2022-a thawhdun dan tur chungchang buaipui tura an din a ni.
Nimina meeting-ah hian digital, green technology, sumdawnna leh investment bakah bungrua in thawn chungchang bakah semiconductor, artificial intelligence leh 6G telecommunication lam huang tih zauh chungchangte sawi ho a ni. India aiawhin external affairs minister S Jaishankar, commerce minister Piyush Goyal leh electronics and information technology minister Ashwini Vaishnaw-te an tel. EU aiawhin European Commission presiden Ursula von der Leyen leh EU-a College of Commissioners member 20 te telin, an zingah hian EU technology commissioner Henna Virkkunen, trade commissioner Maroš Šefcovic leh innovation commissioner Ekaterina Zaharieva te an tel.
EU hian India-a sumdawnna huang zauhna tur leh ram pahnihte hlawkpui theih tur in sumdawn tawnna leh economic hmasawnna thlen thei tu kalpui a tum a ni. EU leh India insumdawn tawnna hian 2023-24 financial year khan USD vbc 135 a tling pha. India-in EU rama bungrua a thawn chhuah hlut zawng chu USD vbc 76 niin, EU aṭanga bungrua chawkluh hlut zawng chuan USD vbc 59 a tling pha bawk. India-in bungrua lama sumdawnnaa a thawhpui lian ber a ni.
Kum 2023-a services kaltlanga ram pahnihte insumdawn tawnna chu USD vbc 53 a tling. India hian USD vbc 30 hu hlutna thawn chhuakin, USD vbc 23 hu India chuan a chawk lut a, hei hi service huanga insumdawn tawnnaa an thlen san ber a ni pha a ni. EU hian India-a investment an tih hlut zawng chu USD vbc 117 tlingin, India-ah European company 6,000 an awm. India-in EU rama investment a tih hlut zawn chu USD vbc 40 a tling pha bawk.
