Uttarakhand-ah vur tawlhin BRO hnathawk 57 chhilh

Uttarakhand-a Chamloli district-a Mana khuaah nimin khan vur tawlhin Border Road Organisation (BRO) camp-a hnathawktu 57 a chhilh a, an zinga mi 16 chu chhanchhuah an ni tawh.

Uttarakhand chief minister Pushkar Singh Dhami chuan kawng siamnaa thawk, BRO mi leh sa te camp chu ramri hnaih khua Mana-ah awmin an camp hi vurtawlh hian nimin zinglam khan a chhilh thu a sawi. Chhiatna thlenna hmunah hian Indo-Tibetan Border Police (ITBP) leh sipai ṭhahnem takin chhanchhuah hna an thawk tih a sawi bawk.

Hnathawktu chhanchhuah 16 zingah hian mi palite chu an dinhmun a hlauhthawnawm nia tarlan a ni. "Heng hnathawktute hian Tibet ramria sipai chet vel ti awlsam tur hian vur hnawkte an ti fai ṭhin a, mahse helai hmuna vur sur reng chuan chhanchhuah hna thawh a ti sawt lo hle" tiin chhiat tawhna dinhmun hi Chamoli district megistrate chuan a sawi.

Vur tawlh chhan hi hriat la ni lo mah se Chandigarh-a Defence Geoinformatics Research Establishment (DGRE) chuan Ningani khan Chamoli, Uttarkashi, Rudraprayag, Pithoragarh leh Bageshwar district huam chhunga awm leh, meter 2,400 aia sanga awmte chu vur tawlh thut thei laka fimkhur tura hriattirna a lo tichhuak a ni. Chhiatna thlenna hmunah hian chhanchhuah hna hi thawh chhunzawm zel a la ni bawk.