Indian Council of Medical Research (ICMR) tarlan danin nimin, Thawhṭanni khan Bengaluru-ah Human Metapneumovirus (HMPV) hri kai mi pahnih hmuh chhuah a ni a, nausen ve ve an ni. Nausen thla thum mi chu chhuahtir a ni tawh a, thla riat mi chu Karnataka khawpuia damdawi inah enkawl mek a ni. Hei hi India rama HMPV vei report hmasa ber a ni.

HMPV kai an hmuh chhuah hi Karnataka-a cheng ve ve niin Baptist Hospital, Bengaluru-ah admit an ni a, endikna an neih hnuah bronchopneumonia nei tawh an ni tih pawh hmuh chhuah a ni. Thla thum mi hi ṭha takin damdawi-in atangin chhuah a ni tawh a, thla 8 mi pawh hian ṭhat lam a pan mek nia sawi a ni bawk.

Karnataka health minister Dinesh Gundu Rao chuan HMPV kai hmuh a nih vang hian chiai phah a ngai lo tih sawiin, he hri hi hri thar ni loin, a hmaa hri lo awm sa tawh reng a ni, a ti. India rama he hri kai hmasa ber nia saw pawh hi a dik lo tiin, he virus hi khawvel hrang hrangah pawh kai an lo awm fo a, hri thar leng anga ngaih tur a ni lo tih a sawi.

"He case pahnih hi multiple respiratory viral pathogens routine surveillance hmanga hriatchhuah an ni a, hei hi ICMR-in ram pumah thawkna lam natna enfiah tura hmalakna a kalpui mek na a ni, " tiin sorkar laipui chuan a sawi.

Health Ministry chuan HMPV hmachhawn dan tur ngaihtuah hian nimin Thawhṭanni vek khan meeting an nei nghal bawk. HMPV hi thawkna lam natna a ni a, khawsik ang chi natna langsar lo tak tak a thlen fo thin a, mahse harsatna dang a thlen thei a, a bik takin naute, tar leh taksa chak lohna nei te tan a hlauhthawnawm. He virus hian a chang chuan pneumonia a thlen thei a, thawkna lama harsatna rei tak a tizual thei bawk. A hri hi thlasik leh thlasik tir lamah a leng hluar tlangpui ni a tarlan a ni.

Venthawn thilah sorkar laipui chuan HMPV test na tur laboratory capacity a tipung tawh bawk.Damdawi in hrang hrang te pawh hri kai tharte enkawl an nih zung zung thehna turin inkhunghranna te thuam ṭha tura hriattir an ni a, in enkawlna tur damdawi hman mai tura neisa tura chahin, influenza ang chi natna (influenza-like illness-ILI) leh thawkna lama natna khirh tak tak (severe acute respiratory infections-SARI) case te chu Integrated Health Information Platform(IHIP) kal tlanga hriattir zel turin thurawn pek an ni bawk.