Delhi Airport-ah Brazil mi kut aṭangin ruihhlo Rs vbc 20 hu man

Delhi Airport-ah Pathianni khan Brazil mi pahnih kut aṭangin cocaine ken luh an tum, Rs vbc 20 hu chu man a ni tih customs department chuan a sawi.

An mi mante hi mipa leh hmeichhia niin, December 24, 2024-a Sao Paulo aṭangin Paris kaltlangin an rawn lut a ni. Thu an zawhfiahna aṭangin ruihhlo an dahna, capsule/pellet chu an dawlh tih an sawi. Hemi hnu hian Safdarjung hospital-ah hruaiin, an ruihhlo dawlhte lak chhuah leh ek chhuah tir tumin hma lak a ni. Hetianga an buaipui chhung hi ni eng emaw zat niin, mipa taksa aṭang hian capsule 105 an la chhuak thei a, hetah hian cocaine hi gram 937 a awm. Hmeichhe taksa aṭangin capsule 58 la chhuak bawkin, cocaine awm zat hi gram 562 a tling bawk a ni. Ruihhlo an lak chhuah theih hi international market-ah Rs vbc 20.98 hu vel nia chhut a nih thu customs department chuan an tarlang.