Karnataka HC kutah Amazon leh Flipkart case hlan chhawng

Supreme Court chuan Thawhṭanni khan Amazon leh Flipkart-in Competition Commission of India (CCI) in e-commerce te thil dik tawk lo nia puha a chhuina chungchanga petition an thehluh chu Karnataka High Court ngaihtuah turin a hlan chhawng.

Justice Abhay S. Oka leh justice Ujjal Bhuyan awmna bench chuan he case hi ngunthluk taka ngaihtuah turin Karnataka High Court chuan a ti a ni. CCI leh e-commerce seller te pawhin Karnataka High Court hnena case hlan chhawn hi an remti bawk. CCI hian ahmain Amazon leh Flipkart a chhui chungchanga petition lut zawng zawngte chu High Court pakhata hlan chhawn vek a lo dil tawh a ni.

CCI hian Amazon leh Flipkart hi a chhuizuina chhan letna atana seller te hmang ṭangkai a, petition thehlut tirah a puh. Hetih lai hian e-commerce seller te hian CCI hi forum shopping tiah an puh bawk. Forum shopping hi an thubuai ngaihtuahtu tur thlan chungchangah, an duh ang zawnga thutlukna siam thei tur court leh jurisdiction thlang te hi an ni a, 'bench hunting' tih a ni bawk. CCI hian Amazon, Flipkart leh an vendor-ten high court hrang hrangah petition an thehluh 27-te chu Delhi High Court a hlan chhawng vek turin an lo ngen tawh bawk.

Amazon leh Flipkart case hi kum 2019-a Delhi Vyapar Mahasangh complaint thehluh aṭanga lo inṭan tawh a ni. Online marketplace te hi seller duhsak bik neihah puh an ni. Kum 2020, January 13 khan CCI chhui chiang ṭanin, ruahmanna an siam dan te, discount pek dan leh list siam dante pawh an chhui a ni. Mahse CCI thil chhui danah hian lungawi loin, Amazon leh Flipkart-a online seller tam tak chuan court hrang hrangah petition hi an thehlut a ni.