Ni thum chama US-a zin, prime minister Narendra Modi chuan New York-ah UN General Assembly session hmang tura kal ram hrang hrang hruaitute inkawmna a neihpui nghal a, an zingah hian Nepal prime minister KP Sharma Oli leh Palestinian president Mahmoud Abbas te pawh an tel.

UN General Assembly session kar lakah Modi hian ram dang hruaitute hi a kawm a, an inkawm chungchang hi a X-ah a tarlang nghal bawk.

"Nepal PM KP Oli nen New York-ah in kawmna hun ṭha kan nei a, India leh Nepal chuan thawhdunna ṭha leh chak tak nei tawh mah se, a aia ṭha leh ngelnghet zawka inthlunzawmna neih kan duh a ni. Kan inkawmnaah hian insumdawn tawnna, energy leh technology lamte kan thlur bing a ni," tiin Modi chuan a sawi. Nepal PM hi PM atana lak luh a nih hnua ram pawn lama a zin chhuahna hmasaber a ni.

Palestinian president Mahmoud Abbas leh PM Modi inkawm chungchang chu Ministry of External Affairs (MEA) chuan X-ah tarlangin, "PM chuan Gaza-a chengte harsatna tawh mekte a ngaihven thu hrilhin, India in Palestine mipuite a thlawp zel tur thu pawh a sawi nawn leh a ni," a ti.

Modi chuan Kuwait Crown Prince Sheikh Sabah Khalid Al Sabah pawh hmuin, ram pahnihten hmasang aṭanga thawhdunna an lo neih tawhte thuk leh nghet lehzuala siam a, ram mipuite inpawhna ṭha tak siam dan turte an sawidun tih MEA chuan a tarlang bawk.

Prime Minister hian kar liam ta Inrinnia Wilmington, Delaware-a US president Joe Biden kaihhruai Quad Leaders's Summit a hman zawhah, Pathianni khan New York hi a thleng a ni. Wilmington-ah hian summit kar lakah President Biden bakah, Japan prime minsiter Fumio Kishida leh Australia prime minister Anthony Albanese te chu inbiakna a lo neihpui tawh bawk a ni.