Child pornography en leh download hi POCSO Act bawhchhiatna: SC

Supreme Court chuan nimin, Thawhṭanni khan "naupang mipat hmeichhiatna hmansualna lam rawngkai" lanna en leh download chu POCSO Act bawhchhiatna a nih thu puangin, hemi chungchanga Madras High Court thutlukna siam tawh chu a hnawlsak.

SC hian Madras High Court-in "naupang mipat hmeichhiatna hmansualna lam rawngkai" en chu POCSO Act a kalh lo tia a sawi chungchanga ngenna thehluh chu ngaihtuahin, chief justice of India(CJI) DY Chandrachud leh justice -JB Pardiwala leh Manoj Misra te awmna bench chuan Madras High Court thutlukna siam hi a dik loh thu a rawn puang a ni.

Madras High Court chuan thutlukna a siamah tihsual lian tak a nei a ni tiin, Supreme Court chuan High Court thutlukna hi a hnawlsak. POCSO Act kalpui dan tura kaihhruaina hrang hrangte chu justice Pardiwala chuan an thutlukna siam, ziaka a dahah a rawn tarlang tel a ni. Madras High Court hian child pornography en leh a material kawl ringawt chu thehdarh a nih loh chuan dan bawhchhiatna a ni lo tiin a sawi a, mahse SC chuan hei hi a pawmsak ve thei lo a, hetiang hmanrua kawl, thuneitute hnena hriattir loh chu dan bawhchhiatna a ni nghal a ni, a ti ve thung.