Kejriwal-a'n Navratri kût laiin official residence chhuahsan tum

Delhi Chief Minister aṭanga bang ta, Arvind Kejriwal chuan CM official residence chu October 3 aṭanga hman tur, Navratri kût chhungin a chhuahsan dawn tih a sawi.

September 17-a CM aṭanga a ban tur thu a puan hnuah vantlang hmaa thu a sawi lehna hmasa berah, Kejriwal chuan BJP chu na taka rawn beiin, dawt hmanga thubuai siamsakah a puh.

Excise policy kaihhnawiha thubuai siamsak a nih avangin Kejriwal hi man a ni a, Tihar jail-a thla nga chhung a tan hnuah September 13 khan bail in a chhuak a ni. Kejriwal chuan politics chu thuneihna leh dinhmun pawimawh chelh tum vanga khel a ni lo a, ram tana thawk tur zawka zawm a nih thu a sawi.

AAP in kum 10 chhung Delhi-a sorkarna an siam chhung khan mipuite tan a thawkin, tui leh electric-te a thlawn a an pek te chu BJP hian an ngaithei lo a, "Hei vang hian Modi chuan inthlana AAP an hneh theih chuan AAP an tukdawl theih ringin, dik lo taka thubuai min siamsakin jail-ah min khung ta a ni," a ti.

CM aṭanga a banna chhan pawh dik lo taka eiruka puh a nih vang a ni tiin,hei hian a rilru a ti na takzet tih a sawi. "Kum 10 chhung khan sum lama hlawkna engmah ka nei lo a, mahse mipuite min zahna erawh ka hlawh chhuak a ni," tiin, eiruknaa inhnamhnawiha puh a nih vangin a zahawmna vawn nun zelna turin a bang tih a sawi bawk.

Kejriwal chuan kum 10 chhung mipuite rawng bawl hna a thawh chhungin a ma pualin in a nei lo a, hei vang hian duhsaka an awmna tur lo buatsaihtute zingah an awm mai dawn tih a sawi. An ina awm tura sawmtu pawh mi tam tak an awm thu a tarlang.