Trinamool Congress (TMC) Rajya Sabha MP Jawhar Sircar chuan Pathianni, September 8 khan West Bengal chief minister, Mamata Banerjee hnenah Parliament member a nihna aṭanga a banna a theh hlut. Hei hi Kolkata hospital-a doctor zirlai pawngsual leh thah a nih chungchangah Bengal sorkar chuan a tih tur a hlen tawk lo nia a hriat vang a ni.

Chief Minister hnena lehkha a thawnah, Sircar chuan TMC hruaitu lu leh CM ni lai Mamata Banerjee chu a kaihhruai party chhungah " awmdan mawilo leh induhsakna diklo, hlemhletna thleng a venghim tawk lo" tiin a sawi.

Sircar hian thla eng emaw zat chhung mimal taka Banerjee biakna a neih pui theih tawh loh avang pawhin a lawm loh thu a tarlan bakah, hlemhletnaa inhnamhnawih official-te laka action lak a ni lo leh, party in buaina a chingfel thei lo chu a dem hle tih te pawh a tarlang bawk. " State sorkar-in hlemhletna a palzam ta lutuk leh tharum thawhna lama hruaitu ṭhenkhate an in hmang nasa ta lutuk chuan min ti hnual hle a ni," tihte a ziak tel. Hei bakah officer leh doctor, hlemhletna nei ten duhsakna leh posting ṭha an chang zel thei chu a pawm thei lo tihte ziak telin, hengte avanga politics aṭanga in hnuhdawh duh a nih thu te a tarlang bawk a ni.

Tun kar liam ta chhung khan Mamata Banerjee hian RG Kar-a thil thleng a hmachhawn dan chuan sawiselna leh demna nasa tak a party chhung aṭangin a tawk nasa hle a, TMC hruaitu Santanu Sen pawh state enkawl damdawiin chungchang inrelbawlna a sawisel hnu lawkah a post chelh lai aṭanga ban a ni a, veteran leader Sukhendu Sekhar pawhin doctor pawngsual leh thah a nih chungchanga hnuchhuina ah hian sorkar lakah zawhna a lo siam tawh bawk.