West Bengal Assembly-ah nimin, September 3, 2024 khan anti-rape bill pharh a ni a, member-ten voice vote hmangin lungrual takin an pass nghal.
State law minister Moloy Ghatak chuan Assembly special session-ah pawngsualtute hremna na zawk pek theihna tur, anti-rape bill, Aparajita Women and Child (West Bengal Criminal Laws Amendment) Bill, 2024, hi a pharh a ni.
Chief minister Mamata Banerjee-in bill an pass chu thil chhinchhiah tlak leh state dang tan pawha entawn tlak a nih thu sawiin, sawihonaah BJP MLA-te chu he bill hi Governor-in a sign thuai theihna tura nawr turin a ngen zui bawk.
Chief Minister chuan pawngsualna chu mihring tana anchhe rapthlak tak a ni tiin, hetiang pawikhawihna thleng ṭhin veng tur hian khawtlangah pawh insiamṭhat a ngai a ni, a ti.
Assembly-a leader of opposition, Suvendu Adhikari chuan eptu pawl, BJP MLA-te pawhin he bill hi an thlawp hle tih sawiin, Bill hi a rang thei ang bera hman theih nghal pawh an duh tih a sawi. Bill-a siamṭhat tur rawtna a siamte erawh House chuan a pawm lo thung.
West Bengal Assembly-in anti-rape bill a pass takah hian, pawngsualtu chu a mi pawngsualte an thi emaw, ramtui leiloa an awm zui emaw a nih chuan tihhlum rawt a ni. Hei bakah pawngsual leh pawngsual rawnna thlenga inhnamhnawihate chu chhuah lailawk awm loa dam chhung lungin tantir tura rawt a ni bawk.
August thlaa sorkar enkawl, R.G. Kar Medical College and Hospital-a doctor zirlai rawng taka pawngsual leh thahna thleng chuan Kolkata boruak a la luah hneh hle a, state sorkar leh police-te pawhin dem leh sel an tawh phah nasa hle. Hemi kaihhnawih zelah hian state sorkar chuan anti-rape bill pharhna tur hian ni hnih awh special assembly session chu Thawhṭanni leh nimin khan a ko a ni.
