Gangster-turned-politician, Atiq Ahmed leh a unaupa Ashraf Ahmed-te chu kar liam ta Inrinni zan khan Uttar Pradesh-ah police-ten an escort laiin kahhlum an ni.

Ahmed-te unau hi Prayagraj-a medical checkup tura an kal, police eng emaw zatin an escort laiin, reporter nia inchhal mi pathum chuan hnai takah an kaphlum a ni. He thil thlen hun hi zan dar 10:30 vel a ni a, media lamin an umzui avangin an kahhlum lai hi TV-a an live lai a ni bawk a ni. TV bakah social media lamah pawh video hi a darh nasa hle.

Atiq Ahmed hian thubuai tam tak a nei a, heng zingah hian mi rukbo, tualthah leh sum laksak thubuaite pawh a tel. March thla khan mi rukbo thubuaia local court chuan midang pahnih nen damchhung tang turin a lo hrem tawh a ni.

Samajwadi Party MP hlui, kum 62 mi Atiq Ahmed leh a unaupa Ashraf-te hi February 24-a Umesh Pal thah a nih chungchangah April 13 khan police-ten an hreng a ni. Inrinni zan khan Calvin Hospital-ah medical checkup turin an hruai a, mahse reporter anga inchhal mi pathumten lo kawmin, hnaihchilh takah an kaphlum ta a ni. Heng mi pathumte hi police-te kutah an inpe zui bawk. Reporter anga inchhala tualthattute hi Lovlesh Tewari, Sunny Singh leh Arun Maurya-te an ni.

Atiq Ahmed-a fapa, Asad Ahmed chu a hma ni hnih liam taah khan Jhansi-ah police-te nena an inkahnaah kahhlum a lo ni tawh bawk. Uttar Pradesh-ah hian kum ruk chhungin pawikhawihtu nia puh, mi 180 chuang chuan police-te nen an inbeihnaah kahhlum an lo ni tawh.

Police-te venna hnuaia an awm lai renga Ahmed-te unau kahhlum an ni chu Uttar Pradesh sorkar leh police-ten sawisel leh beih an tawh phah nasa hle. UP chief minister hlui, BSP hotu Mayawati chuan he thil thleng hi Supreme Court-in a chhuizui a ṭul tih a sawi. AIMIM president Asaduddin Owaisi pawhin UP-a chief minister Yogi Adityanath kaihhruai BJP sorkar chu demin, CM hlui hi bang turin a phut bawk. Trinamool Congress MP Mahua Moitra pawhin BJP chu India ram 'mafia republic' a chantirah puhin, police-te kuta awm lai, camera eng emaw zat hmaa an thla an lak reng laia mi pahnih kahhlum an ni chuan rule of law in awmzia neih loh zia a lantir a ni, a ti. Rajya Sabha MP leh Congress hruaitu hlui Kapil Sibal pawhin, BJP kaihhruai UP sorkar chu demin, tualthahna pahnih thlengin Atiq leh a unaupa-te bakah rule of law pawh thah a ni bawk a ni, a ti.