CBI-in thu zawhfiah turin Delhi CM Kejriwal an ko

Delhi excise policy kaihhnawihah Central Bureau of Investigation (CBI) chuan Delhi chief minister, Aam Aadmi Party (AAP) hruaitu Arvind Kejriwal chu nimin khan thu zawhfiah turin an ko.

Delhi-a AAP sorkar hian kum 2021-22 khan excise policy hi siamin a titawp leh tawh a ni. Zu zawrhna tura phalna pek danah sorkar thamna petu sumdawng ṭhenkhat chu duhsak bikah puh an ni. Hei vang hian he policy siam leh kalpui a nih dan thil dik tawk lo awm nia puh chungchangah, AAP hruaitu leh Delhi deputy chief minister hlui Manish Sisodia chu mawphurtu zinga puhin CBI hian an lo man tawh bawk.

Nimina CBI office a pan hmaa a twitter-a video a dahah, Kejriwal chuan BJP chuan amah man turin central agency chu thu an pe pawh a ni thei tih a sawi a, BJP chu an lal em avangin tupawh jail-ah an tantir thei a ni, tiin a tiel. "BJP-in thu a pek chuan CBI chu engnge a nih? CBI chuan min man mai dawn a ni," a ti. Kejriwal chuan tih dik loh leh thup engmah an neih loh avangin CBI-in zawhna an zawhte pawh dik taka a chhan tur thu a sawi.