China-in Arunachal Pradesh state-a hmun 11 hming a phuah ṭhatte chu sorkar laipui chuan hnawlin, AP chu India ram chhung a ni a, a ni reng dawn bawk a ni, a ti.

Arunachal Pradesh hi China chuan a ram chin niin a chhal a, 'Zangnan, the southern part of Tibet' tiin a sawi ṭhin. Thawhṭanni khan state chhung hmun 11 hming a phuah ṭhatte list chu a tichhuak a ni. Hei hi China-in AP-a hmun hming a phuah ṭhat ṭum thumna a ni.

China-in hmun hming a phuah ṭhat zingah hian tlang panga, land area pahnih, residential area pahnih leh lui pahnih a tel. Kum 2017 leh 2021 khan China hian AP-a hmun hming a phuah ṭhatte list a lo tichhuak tawh bawk. Heng list-te hi China civil affairs ministry-in a tichhuah an ni.

Sorkar laipui chuan thuchhuah siam nghalin, China thiltih chu a pawm loh thu a sawi. External affairs ministry thupuangtu Arindam Bagchi chuan, "Tun hi hetianga a tih ṭum khatna pawh a ni lo, an thiltih hi kan hnawl nghal a ni," a ti. AP chu India ram a ni reng dawn a, hetianga hming rawn phuah ṭhat hian thil awmdan dik tak a tidanglam dawn chuang lo tih a sawi.

Kum 2020, May thlaa Ladakh khawchhak lam ramria India leh China sipaite intihbuaina a thlen hnuah, ram pahnihte hian boruak ṭha siam tumin hma la reng mah se ramri boruak hian ngai a la awh thei lo a ni. External affairs minister S Jaishankar chuan thla hmasa khan Ladakh-a Line of Actual Control (LAC) boruak a la derthawngin, a la hlauthawnawm reng tih a sawi a ni.

PM Modi ngawih tlat vangin India-in a tuar : Congress

Congress party chuan China-in AP hmun eng emaw zat hming a rawn phuah ṭhat chu na takin an sawisel ve nghal a, hemi rual hian China nen ramri chungchanga buaina neihah prime minister Narendra Modi a ngawih tlat zel avangin an rawn huangtau niin an sawi. Congress president Mallikarjun Kharge chuan China laka PM Modi inthliarfihlim duhna chu India ramin a tuar zel a ni, a ti.

All India Congress Committee (AICC) general secretary Jairam Ramesh chuan tun hnaiah China diplomat pakhat chuan India-China border dinhmun chu a pangngai tawh tih a sawi a ni tiin, "Mahse China hian min rawn nawr chhunzawm reng a ni. Tunah phei chuan a vawi thumna atan AP-a hmun hmingte a rawn thlak leh ta a ni. Kum 2020-a thil thleng PM Modi-a'n China thiam a chantir leh, China chetdan chungchanga a ngawih tlatna man chu kan pek zel a ngai ta a ni," tiin a sawi.

Ramesh chuan Arunachal Pradesh chu India ram a ni a, pawhhran theih a ni lo tih sawiin, AP mipuite pawhin India khua leh tui an nihna an chhuang hle a ni, tiin eng kawng mahin thudik tak hi tihdanglam theih a ni lo a, India mipuite pawh a tibuai dawn lo tih a sawi.