India ramah Covid-19 hri kai mek 21,000 chuang tawh

India ramah Covid-19 hri kai an pung chho leh mek a, nimin zing dar 8 thleng khan ram pumah hri kai mek, active case 21,179 an awm tling tawh.

Union health ministry data-a a landanin, Thawhṭanni khan hri kai thar hi mi 3,038 hmuh chhuah belh an ni a, hripui vanga thi mi pakua an awm bawk.

Nimin thlenga hri kai hmuh chhuah tawh hi mi 4,47,29,284 an tling a, hri kai mek hi an zinga 0.5% an tling. Hetih lai hian hri kai, enkawl dam tawh hi 98.76% an awm thung.

Hri kai zinga 1.19%, mi 5,30,019 chuan Covid-19 hi an thihpui tawh a ni.

Health ministry chuan nimin thleng khan ram pumah Covid vaccine dose vaibelchhe 220.66 pek chhuah a ni tawh tih a sawi bawk.

Hri kai pun tamna, Maharashtra-a Satara district-ah chuan government leh semi-government office, college leh bank-ah hnathawkte leh official-te chu an hnathawhna hmunah face mask hmang vek tura tih an ni. He thupek hi Thawhṭanni khan Satara Collector Ruchesh Jaivanshi chuan tichhuakin, an district chhunga chengte pawh pawn chhuahnaa mask hmang tur leh, midang nena inhlata awm a, mipui tamna hmuna an kalin an kut silfai ṭha turin a chah.

Union health minister Mansukh Mandaviya chuan hri kai an pun chhoh lehna chhan hi XBB.1.16 variant vang niin a sawi a, mahse a hmaa anga hlauhthawn tur a awm loh thu a sawi. Omicron sub-variant leng thar leh vanga damdawi-ina dah luh ngai an pun phah loh thu a sawi a, hemirual hian mitinte erawh inven leh fimkhur a ngaih reng thu a sawi.