Delhi-a Okhla area-ah mi ṭhenkhatten buaina siam an tum nia thu an dawn avangin Delhi police-te chuan curfew a puang a, hemi hnu hian Jamia Millia Islamia University chuan an zirlai leh zirtirtute chu campus leh a chhehvelah awmkhawm lo turin a chah.
Jamia Naga police station-a officer chuan pawikhawihna thlen tum an awm thu an dawn avangin September 19 aṭang khan CrPC Section 144 hnuaiah curfew hi puan a nih thu leh, November 17 thleng hman a nih tur thu a sawi a ni. Dan leh thupek kengkawh turin paramilitary force-te dah an ni bawk. Police-te chuan he thil hi Islamic organisation, Popular Front of India (PFI) laka hma lak mekna nen inzawmna a nei lo niin an sawi.
Univeristy chief proctor chuan Thawhṭanni khan thuchhuah siam ve nghalin, zirlaite bakah teaching leh non-teaching staff zawng zawngte chu campus chhung leh a chhehvela awmkhawm lo turin a ti a, kawngzawh leh meeting-te pawh buatsaih lo turin a ti bawk. He thuchhuah siam hma hian Jamia zirtirtute chuan campus-ah lungawi lohna lantirin kawng an zawh a ni.
Nimin khan state ṭhenkhatah PFI-te hmun dap leh niin, an pawl member eng emaw zat man an ni. Assam bakah Karnataka, Madhya Pradesh, Delhi, Maharashtra leh Uttar Pradesh-a PFI hmunte dap a ni. September 22 khan National Investigation Agency (NIA) chuan state 15-ah PFI hmunte dapin, an pawl member 106 an lo man tawh bawk.
NIA hian pawikawihna leh firfiaka chetna thleng thlawpa cheah puhin PFI hmunte hi an dap a ni. Hetih lai hian PFI political wing, Social Democratic Party of India (SDPI) chuan central agency chet dan hi na takin an sawisel a ni. Rashtriya Swayamsevak Sangh (RSS) leh a hnuaia pawl awm hrang hrang, pawl leh chibing inhuatna thlen zawnga che te laka central agency-in hma a lak ve loh chhan an zawt. Sorkar laipui chu mipuite rilruah SDPI leh PFI organisation huatna siam tumah puhin, ram chhunga pawl dang hlauhawm tak tak - RSS leh Bajrang Dal, Vishwa Hindu Parishad, Sri Ram Sena-te chu NIA chuan a bei ve lo a ni, tiin SDPI hruaitu Bharsakr chuan a sawi.
