BJP hruaitu pahnih, Nupur Sharma leh Naveen Kumar Jindal-ten prophet Muhammad chungchang an sawi dan sawiseltu ram an pung zel a, ram 15-in an thusawi an demna thu an tichhuak tawh.
Heng ram 15 - Iraq, Iran, Kuwait, Qatar, Saudi Arabia, Oman, UAE, Jordan, Afghanistan, Pakistan, Bahrain, Maldives, Libya, Turkiye leh Indonesia-te hian official-in India rama rorellai, BJP hruaitu pahnihten Prophet Muhammad chungchang an sawi dan an demna an tichhuak tawh a, India sorkar pawh ngaihdam dil turin an phut bawk.
BJP hian Sharma hi party member a nihna aṭangin a suspend a, Jindal hi party aṭangin a hnawtchhuak tawh bawk a ni. Thuchhuah pawh siamin, an party chuan sakhaw indeuhsawhna leh inhmuhhniamna chu a duh lo a, hetiang ngaihdan neite pawh a thlawp ngai lo a, sakhaw tin a zah vek tih an sawi.
Organisatin of Islamic Cooperation (OIC) chuan United Nations hnenah India rama sakhaw tlem zawkte dikna chanvo humhalh sak an nih theihna tura a ṭul anga hma la turin a nawr.
Eptu party hrang hrangte chuan BJP-in Sharma leh Jindal-te a hremna chu lemchanna mai nia sawiin, man ngei an phut tih an sawi thung. Central-a BJP kaihhruai sorkar chu khawvel hmuhah India hmel tichhetu a ni, an ti. An party hruaitute thusawi chungchanga ngaihdam an dil ringawt chu a tawk lo a, man an ni ngei tur a ni, tiin an sawi.
All-India Muslim Personal Law Board chuan BJP-in an party hruaitu pahnihte a hrem chu ṭha hle mah se, an hremna hi a tawk lo tih sawiin, dan ang taka an chungthu relsak turin a phut. Ittehad-e-Millat Council (IMC) chuan Sharma laka legal action lak a nih loh chuan June 10 hian ram pumah lungawi lohna lantir an tum thu an sawi bawk.
Delhi Police-ten Sharma leh a chhungte venhimna pe
Prophet Muhammed chungchanga a thusawi avangin Nupur Sharma lakah lungawi lo an pung zel a, thahah vauna a tawh thu police-a a complaint hnuah, Delhi police chuan Sharma leh a chhungte hi venhimna an pe tih nimin khan an sawi.
Nupur Sharma hian kar liam taa TV news debate-a prophet Muhammad sawichhiatna thu a sawi avang hian ngaihdam dilna pawh a tichhuak tawh a, "Mahadev (Lord Shiva) hmusitna leh deusawhna thu sawi a tam em avanga he thu hi sawi ka ni," tiin a thusawi hi a sut leh thu a tarlang a ni.
Maha Police-ten Nupur Sharma ko
Maharashtra police-te chuan prophet Muhammed chungchanga a thusawi vangin Nupur Sharma hi June 22-ah inlan turin a ko.
Mumbai police-te chuan May 28 khan Thane district-ah Nupur Sharma lakah hian FIR an ziaklut a, email leh speed post-in police station-a inlan tura kohna hi thawn a ni, an ti. Mumbai-a Pydhonie police pawhin Sharma lakah hian FIR an ziaklut tawh bawk a, anni pawhin Sharma hi insawifiah tura koh thuai an tum tih an sawi.
