Eiruk thubuaiah Punjab Minister hlui man

Congress party senior leader leh Punjab minister hlui Sadhu Singh Dharamsot chu nimin zing khan eiruk thubuaiah man a ni.

Chief minister hlui, Amarinder Singh kaihhruai sorkara social welfare and forest minister ni ṭhin, Dharamsot hi state Vigilance Bureau chuan Amloh-ah an man a ni. Hemi hma hian minister a nih laia forest department-a dik lo taka thiltitua puh, district forest offier Guramanpreet Singh leh contractor Harminder Singh Hummay-te pawh man an lo ni tawh bawk.

Punjab Vigilance Bureau chief director, Varinder Kumar chuan district forest officer leh contractor-te thu an zawhfiahna aṭangin, minister hlui Dharamsot hi eiruknaah a inhnamhnawih tih hriatchhuah a nih thu a sawi. Hna an thawhna tura thingkung pakhat kih manah Dharamsot hi Rs 500 zel pein, Rs vaibelchhe 1.25 an pe hman tih an sawi. Hei bakah hian Minister hlui hian forest department-a official-te posting leh transfer chungchangah pawh thamna sum a la ṭhin a, no-objection certificate peknaah pawh sum la zel ṭhin tih Chief Director chuan a sawi. Prevention of Corruption Act hnuaiah thubuai siamsak a ni, a ti.