India ramah Covid-19 hri vanga thi mi nuai nga an tling tawh a, hetih lai hian health expert ṭhenkhat chuan thi zat hi sorkarin a chhinchhiah zat aiin an tam zawk hle a rinawm tih an sawi.
Khawvel ram zingah India hi Covid hri thihpui tamna ram pathumna a ni mek. US chu hripui vanga thi tamna ber ram a la ni chhunzawm zel a, mi nuai 9.1 in an thipui tawh a, Brazil-ah nuai 6.3 an thi tawh bawk. India chu pathumnaah awmin, thihpui zat nuai ngaah an chho a, Russia-in dawt lehin,mi nuai 3.3 an thi tawh a, Mexico-ah Covid hri vangin nuai 3.07 an thi tawh bawk.
India rama Covid hri vanga thihna hmasa ber chu kum 2020, March 12-ah khan a thleng a ni. Hemi kum vek October 2-ah hripui vanga thi hi nuai khat an tling chho a, kum 2012, April 27-ah nuai hnih an tling leh bawk. Kum 2021, May 23-ah hri vanga thi hi nuai thum an tling leh a, July 1-ah nuai li tlingin, kumin February 3-ah nuai nga an tling chho leh ta a ni.
Ram chhunga Covid hri leng thawh khatna thlen lai khan hri kai zinga thihpui zat, fatality rate hi 1.42% a ni a, hri leng thawh hnihnaah 1.36% niin, tuna hri leng thawh thumna thleng mekah thihpui rate hi 0.16% a ni mek.
India rama Covid-19 vanga thi, mi nuai nga chuang zinga 11% hi Kerala state ami an ni.
Covid-19 vanga thi hi sorkarin a record ai hian a taka an tam hle zawk a rinawm thu health expert-te chuan an sawi. International studies eng emaw zat neihah India chu khawvela Covid vanga thi tamna ber ram a ni thei tih an sawi a, mahse heng an zirchianna hi sorkar chuan a pawm lo thung.
Positivity rate 9.2% ah tla hniam
Union health ministry-in a tarlan danin, Ningani khan India-ah Covid-19 hri kai thar mi nuai 1.49 an awm belh leh a, hri kai thar hi a hma ni aiin 13%-in an tlem a, positivity rate pawh 9.2% ah a tla thla. Weekly positivity rate pawh 12.03% ah a tla hniam tawh bawk.
Hri kai mek, active case chu hri kai hmuh chhuah tawh aṭangin 3.4% an ni a, enkawl dam chu 95.39% an ni bawk.
Ningania hripui vanga thi hi 1,0722 niin, ni thum chhung chu a zawnin ni khata thi zat hi 600 chunglam an ni tawh.
