Delhi-ah mahni chauha motor chuang tan mask vuah ngai lo

Delhi disaster management authority (DDMA) chuan Covid-19 kaihhruaina dan siamte a ennawn hnuah, motor khalhtu, phurh nei loa mahni chauha chuangte chuan mask an vuah kher a ngai tawh lo tih an sawi.

Delhi High Court chuan a hmain motor-a mahni chauha chuangte mask vuah tura tih an la nih chhan hi zawtin, hei hi thil awm lo tak a nih thu a lo sawi tawh a ni.

February 7 aṭangin Delhi sorkar chuan school, college leh coaching institute-te hawn a ni tawh dawn tih nimin khan a puang. Deputy chief minister Manish Sisodia chuan school hi Class 9-12 te hawn an ni dawn a, Class 8 hnuai lam chu February 14 aṭangin hawn ṭan a ni ang, a ti.

Zan lam curfew pawh thlahdul a ni dawn a, zan dar 10 aṭanga curfew neih ṭan chu zan dar 11-ah tihtlai a ni ang. Restaurant-te pawh zan dar 11 thleng hawn phalsak an ni a, sorkar leh private office-te pawh 100% capacity-a kal phalsak an ni tawh bawk. Gym leh spa-te pawh Covid kaihhruaina dan zawm ṭha chunga hawn phalsak an ni tawh a, swimming pool te pawh phal an ni tawh.