Thla 1 chhungin ramchhunga tleirawl 65% in Covid vaccine dose khatna la tawh : Mansukh Mandaviya

India-in ramchhunga tleirawl kum 15-18 inkarte Covid-19 vaccine a pekchhuah aṭanga thla khat a liam hnuah, tleirawl zinga 65% te chuan vaccine dose khatna an la tawh tih Union health minister Mansukh Mandaviya chuan nimin khan a sawi.

Health Minister chuan, "India ṭhalaite'n mellung chhinchhiah tlak tak an siam chhunzawm leh ta. Thla khat chhung lekin, kum 15-18 inkar zinga 65% chuan vaccine dose khatna an la hman a ni. Prime minister Narendra Modi kaihhruaina hnuaia khawvela vaccination campaign lian ber kalpui mekah record siam thar zel a ni," a ti.

Kumin January 3 aṭang khan kum 15-18 te tan rampumah Covid-19 vaccine semchhuah ṭan a ni a, tunah hian ṭhalai maktaduai 50 dawnin dose khatna an la tawh a, dose hnihna la tawh zat chu mtd 3.5 an tling ṭep tawh tih Union health ministry data chuan a tarlang bawk.

Kum 15-18 inkarte hi Hyderabad a hmunpui nei, Bharat Biotech siam Covaxin vek pek an ni a, dose khatna an lak aṭanga ni 28 hnuah a dose hnihna hi an la leh nghal thei a ni.

India ramah Covid vaccine hi nikum January 16 aṭanga khan pekchhuah ṭan a ni. A hmasa berah haelthcare worker (HCW)-te pek niin, February 2-ah frontline worker (FLW)-te pek ṭan ni ve lehin, March 1 aṭangin kum 60 chin leh, kum 45 chunglam natna benvawnte pek an ni. Kum 45 chunglamte tan April 1 aṭangin ram pumah vaccine hi pek chhuah chhunzawm a ni a, hemi hnu May 1 aṭangin kum 18 chinte pek an ni ve leh bawk.

Nikum December thla khan Prime Minister Modi chuan tleirawlte vaccine pek an ni dawn tih a puan hnuah, kumin January 3 aṭang khan pek ṭan an ni. Hei bakah hian January 10 aṭang khan healthcare worker, frontline worker leh kum 60 chunglam, natna benvawn neite hnena booster dose, precaution dose tia sawi chu pek chhuah a ni bawk a ni.