India ramah Ningani khan coronavirus kai mi 3,47,254 awm thar lehin, Omicron variant kai hmuhchhuah pawh mi 9,692 an tling tawh tih Union Health Ministry chuan a puang. Ramchhunga hri kai hmuh chhuah hi 3,85,66,027 an tling tawh. Hri kai mek, active case chu 20,18,825-ah a sang chho leh a, ni 235 hnua a san ber ṭum a ni. Covid-19 kaihhnawih vanga thi mi 703 awm belhin, thihpui zat hi 4,88,396 an tling tawh a ni.
Omicron variant kai hi Nilaini aṭangin Ningani-ah 4.36% in a pung chho a ni. Expert-te chuan sample zawng zawng genome sequencing a tih theih lo a, mahse tuna hri darh mek chu Omicron variant vang a nih an ring tih an sawi.
Hri kai hmuhchhuah tawh aṭanga hri kai mek hi 5.23% niin, ramchhunga Covid-19 kai dama puan, recovery rate chu 93.50% a nih thu ministry chuan a sawi.
Nikhata hri kai thar zat, daily positivity rate chu 17.49% niin, kartina hri kai thar zat, weekly positivity rate chu 16.56% a ni mek tih health ministry chuan a tarlang. Covid-19 kai dama puan tawh chu 3,60,58,806 a ni tawh a, recovery rate hi 93.50% niin, thihpui zat hi hrikai aṭangin 1.27% an ni.
Ramchhungah Covid-19 vaccine dose vbc 160.43 chuang semchhuah a ni tawh bawk.
Delhi Lt Governor Anil Baijal-an kartawp curfew tihtawp dilna hnawl
Delhi Lieutenant governor Anil Baijal chuan nimin khan kartawp curfew tihtawp, odd-even system-a dawr inhawnchhawk leh khawpui chhunga private office-a hnathawkte 50% kal tir titawp tawh tura chief minister Arvind Kejriwal rawtna chu a lo hnawlsak. Lt governor hian Delhi sorkar chu Covid-19 hri leng dinhmun a ziaawm hma chuan inkaihhruaina an siam anga kalpui leh rih turin a ti.
Delhi chuan Ningani khan Covid-19 kai thar mi 12,306 an neih belh leh a, Nilaini aiin hri kai thar hi an tlahniam tih health department chuan a puang. Hri vanga thi mi 43 awmin, nikum June thla hnua thihpui an tam ber ṭum a ni. Tun thla chhung hian Covid-19 kaihhnawih vanga thi mi 400 dawn an awm tawh bawk a ni. Sample test aṭanga hri kai zat, positivity rate chu 2.38%-ah a tlathla thung a ni.
Delhi sorkar chuan January 20 aṭang khan private laboratory-a RT-PCR hmanga Covid-19 test man chu Rs. 300 ni turin a bituk. Ina sample laksak ngaite chu Rs. 500 aia sang lo turin a ti bawk. Hei bakah hian Rapid antigen test (RAT) man chu Rs. 100 ah a bithliah bawk
Sorkar chuan private lab-te chu sample endik tura an lakte chu an lak aṭanga darkar 12 chhunga result tichhuak hman tur leh, positive result-te chu ICMR portal-ah update vek turin a ti.
