Prime minister Narendra Modi hoin nimin khan political party hrang hrang hruaitute chuan virtual meeting an nei.
PM Modi chuan India ramah Covid-19 vaccine pathum enchhin mek niin, expert-te chuan reiloteah heng vaccine-te hi mipui hman theih tura peihfel theih a nih an ring tawh tih a sawi. Vaccine peihfel a nih hunah a man bithliah dan tur te, semchhuah a nih dante pawh state sorkarte nen sawiho mek a ni tih sawiin, mipui hriselna chu sorkarin a ngaih pawimawh ber a ni, a ti.
Modi chuan vaccine chu peihfel a nih hunah hri dona kawnga a hmathawngtu, frontline worker leh kum upa zawk, natna benvawn neite chu dah pawimawh hmasak an ni dawn tih a sawi. Frontline worker-ah hian damdawi lama thawkte bakah police leh armed force mi leh sa, municipal worker te pawh an tel.
Nimina all-party meeting hian MP panga leh a aia tam nei chin political party hruaitute an tel a ni. Rajya Sabha-a Opposition Leader Ghulam Nabi Azab chuan Congress party aiawhin thu a sawi a, Trinamool Congress aiawhin Sudip Bandyopadhyay, NCP aiawhin Sharad Pawar, TRS aiawhin Nama Nageswara Rao leh Shiv Sena aiawhin Vinayak Raut-ten thu an sawi bawk.
Meeting neih hma hian Congress hruaitu Rahul Gandhi chuan PM Modi hian India mipuite hnena Covid-19 vaccine a thlawna sem a nih theih hun tur a sawichian a beisei thu a sawi. Ramchhunga Covid-19 leng chungchanga sorkar laipuiin all-party meeting a koh ṭum hnihna a ni a, union defence minister Rajnath Singh, home minister Amit Shah, health minister Harsh Vardhan te pawh an tel.
November 24 khan PM Modi hian state chief minister-te chu high level meeting neihpuiin, vaccine semchhuah buaipui dan turte a lo sawipui tawh a, kar liam ta khan vaccine sem dan tur chungchangah meeting pawimawh ṭum li nei bawkin, vaccine siamna hmun pathum- Ahmedabad, Pune leh Hyderabad-te pawh a tlawh bawk.
