Loneitute leh sorkar inrem thei lo Vawiinah an inbe leh dawn

Farm law duh loa Delhi ramria nawrh huaihawt, loneitu hruaitute leh sorkar laipui aiawhte an la in be rem hleithei lo a, hei vang hian vawiinah inbiakna an nei leh dawn.

Ningani khan sorkar laipui aiawh union minister pathum leh loneitu pawl hruaitute chuan Delhi-a Vigyan Bhavan-ah inbiak­na an nei a, mahse he inbiakna hi inremna engmah siam loin an titawp. Loneitute pawl aiawhte hian sorkar laipuiin farm law a siam tharte chu sut turin sorkar hi an phut a, mahse sorkar chuan sut tumnaa nei bik lo a ni. Darkar  8 dawn inbiakna hi an nei a, an inbiak chhung hian loneitute hian chaw chhun, thingpui leh tui pawh an eiin an in duh lo.  

Inbiakna an neihah hian loneitu aiawh 40 dawn an tel a, minister-te hnenah hian farm law tharah hian ngaihtuah kim lo ṭhenkhat a awm thu hrilhin, MSP (minimum support price) leh thil dang danga an lungawi lohna te an thlen a ni. 

Union agriculture minister Narendra Singh Tomar chuan MSP chu sorkar chuan a hmaa a hman dan pangngai angin a la hman reng dawn thu meeting zawha thuthar lakhawmtute a kawmnaah a sawi a, MSP hi thlak a nih loh tur thu pawh a sawi lang bawk. Tomar chuan inbiakna chu boruak muanawm hnuaia kalpui a nih thu a sawi a, sorkar chu a inhawn bakah he farm law thara APMC (Agriculture Produce Marketing Committee) mandi system tihchak tur chungchang te, bazar-a thil zuartute chhiah chawi tur chungchang leh loneituten thubuai an neih changa rorelna sang zawk court-a an thlen theihna tur thuamchhak dan turte chu sorkar chuan a ngaihtuah zel ang, a ti.

Heng bakah hian sorkar chuan thlai ro hal chungchanga dan leh a kaihhawih bakah electric lama dan te chu a ngaihtuah zel dawn tiin Tomar chuan a sawi bawk. Sorkar chuan loneitute tan theihtawp a chhuah dawn a, an harsatna ngaithla turin a inhawng zel dawn tiin a sawi bawk.

Tomar chuan he farm law thar hian APMC system chu a nuai bo dawn niin loneitute hian an ngaih thu a sawi a, sorkar chuan APMC hi tihchhak zel a tum zawk a ni, a ti. APMC-a awm lo madis (market) leh APMC-a awm madis-te chuan intluktlang taka tax an pek dan turte chu ruahmanna fel tak hnuaia kalpui tum a nih thu Tomar chuan a sawi. 

Vawiina inbiakna an neih leh turah hian loneitu hruaitu zinga mi Kulwant Singh Sandhu chuan sorkarin MSP chungchang te leh procurement system-a rawtna a rawn siamte chu sawi ho a nih dawn thu a sawi. All India Kishan Sangharsh Coordination Committee (AIKSCC) General Secretary Hannan Mollah chuan loneituten an duh ber chu farm law thar sut leh hi a ni, a ti.