Congress president Rahul Gandhi chuan nimin khan New Delhi-a Raj Ghat-ah ni khat chhung chaw nghei huaihawtin, hei hi hnam hrang hrangte inpumkhatna atan leh, BJP dawt sawi pholanna atan a ti a ni. Hei bakah hian April 2-te Dalit hnamten nawrh an huaihawt ṭuma buaina chhuak duh lohna lantirna atana ti a ni bawk.
Rahul Gandhi hi a chaw ngheina hmunah hian Delhi Congress hotu Ajay Maken bakah party worker eng emaw zatin an ṭawiawm. State leh district headquarters hrang hrangah Congress worker-te chuan chaw nghei an huaihawt bawk a ni.
Congress party-in nawrh a huaihawt hi sorkar laipuiin ramchhung thil thleng langsar–CBSE paper leak chungchang te, PNB-a inbumna thleng te, Cauvery buaina leh Andhra Pradesh hnena special caterogy status pek phut chungchang te Parliament session neih zawh taka sorkar laipuiin sawihona a buatsaih theih loh chungchang te pholanna atana tih a ni bawk. Congress party chuan SC/ST Act tihdal te, loneitute harsatna leh sorkar laipui laka ṭhalaite lungawi lohna te pawh sawichhuah an la tum bawk a ni.
Parliament session-ah rorel mumal theiloa an awm chhanah sorkar laipui chu a mawhphurtu ber niin a puh a, hetihlaia NDA MP-ten hnathawk loa an awm avanga ni 23 hlawh an la dawn lo tih an sawi chu thil nuihzatthlak tak leh inbumna thil mai a ni, a ti.
BJP chuan Parliament-a rorel theih loh chhanah Congress chu a puh thung a, an party MP-te chuan April 12 hian chaw ngheiin lungawi lohna lantir an tum tih an sawi.
