Nirav Modi leh Mehul Choksi manna tur thupek tichhuak

Punjab National Bank (PNB) kaltlanga sum tam tak dik lo taka lak kaihhnawihah Mumbai-a Central Bureau of Investigation (CBI) court chuan Pathianni khan lunghlu-a sumdawng lian Nirav Modi leh a thurualpui Mehul Choksi-te chu bail theih loha manna tur thupek a tichhuak.

Kumin February thla khan PNB Mumbai branch aṭangin dik lo takin Hong Kong-a Allahabad Bank leh Axis Bank branch-te tan Letters of Undertaking (LoUs) lakchhuah tih hriatchhuah a ni. He lehkha hmang hian Nirav Modi leh midangte chuan dik lo takin cheng vaibelchhe 280.7 an lachhuak a ni. LoU hi Diamond R US, Solar Exports, Stellar Diamonds hminga siam a ni.

Hetih lai hian PNB-a sum tihchingpen kaihhnawiha mawhphurtu bera puh Nirav Modi leh Choksi te hi thil dik lo thleng haichhuah a nih hma hian India ram chhuahsanin an bibo hman a ni. PNB-a thil thleng hi hriatchhuah a nih veleh Modi leh midang inhnamhnawiha puhte lakah Prevention of Money Laundering Act (PMLA) hnuaiah thubuai siamsak nghal an ni.

PNB-a cheng vaibelchhe 13,000 tihchingpen chungchang chhuitu, CBI chuan Reserve Bank Deputy Governor hlui HR Khan pawh thu an zawhfiah tawh a, kar kalta Ningani khan RBI General manager pakhat leh Chief General Manager pathum thu an zawt bawk.