Uttarakhan High Court chuan sorkar laipuiin Uttarakhand-a President's Rule a puan chungchang a ngaihtuahnaah, thutlukna siam kawngah President pawhin a tisual ve thei tho tih a hrilh.

Sorkar lam counsel-in President's Rule puan chungchangah President ngeiin a remtihpui avang≠in court chu an inrawlh tur a ni lo tih a sawi a, hei hi court chuan chhang letin, 'President pawhin a tisual thei a, engkim hi dan hmanga ennawn theih vek a ni" a ti.

Uttarakhand-a President's Rule puan chung≠chang hi High Court chuan a zawnin ni thum a ngaihtuah tawh a, state-a Congress sorkarin a kum nga-na a hman mek laia sorkar laipuiin state sorkar a ṭhiat ringawt chu ṭha a tih loh thu a sawi. "Sorkar a kum nga-na hmang mek chu thil thleng eng emaw vang maiin paihthlak mai theih a ni dawn em ni. He thil thlengah hian democracy bulṭhut chu in pawt phawi a ni. State inrelbawlnaa lo inrawlh hi holam taka ngaih mai tur a ni loa, emergency power chu a ṭul tawpah chauh hman a ni tur a ni" tiin Chief Justice KM Joseph chuan a sawi.

Central-a BJP kaihhruai NDA sorkar chuan Uttarakhand Chief Minister Harish Rawat chu Assembly-ah thlawptu a ngah tawk em tih fiah tura hun pek a nih laiin, fiah a nih hma chiahin President's Rule hi a puan hnan a ni .

Uttarakhand-ah hian Congress MLA 9-te chuan an party hotu leh CM Rawat-a lakah an hel avangin rorellai party chhungah buaina a thleng a, hetihlai hian MLA 28 nei, BJP chuan Congress MLA helte thlawpna nen sorkar an siam thei niin an lo insawi ve reng bawk.

Member 70 awmna, Uttarakhand Assembly-ah hian Congress-in MLA 36, BJP-in 28 an nei.