Delhi CM-in sorkar hnathawk liante vau

Delhi Chief Minister Arvind Kejriwal chuan Thawhlehni-a Civil Services Day a hmanpuinaah, sorkar hnathawkte chu mipuiten rorel tura an thlan chhuahte laka politics khel lo tura vauin, hei hian sorkar hnathawh a pawthniam zawk niin a sawi.

CM Kejriwal chuan, "Thil hrang hrang chu kan tuar thei a, mahse politics erawh chu kan ngaizam mai lo ang. Politics in tuipui a nih chuan in hna atangin bang ula, inthlanah chuh ve mai rawh u" a ti. A kaihhruai sorkar chu a la ding reng dawn tih a sawi bawk.

Kerjiwal chuan, " Kan sorkar chuan Delhi mipuite beiseinate a tihhlawhtlin sak a, mipuite chu an hlim hle a ni. Hetianga sorkar hi a kal zel chuan kum 10-15 chhung kan la sorkar chhunzawm dawn a ni. In duh emaw duh lo emaw, kum 10-15 chhung chu rorelna kan la chelh zel dawn a ni" a ti.

Nikuma AAP sorkar a din aṭang khan sorkar hnathawk liante nena an inkar boruak hi a ṭha vak loa, an buaina tam zawk chu Delhi-a department pawimawh zuala AAP leh central sorkarin thuneihna an inchuhna vanga thleng a ni.

Nikum December thla khan officer tam tak chuan Delhi Andaman and Nicobar Civil Service officer pahnih, sorkar an thawhpui ṭha tawk lo nia puha suspend an nih vanga lungawi lohna lantirin a rualin ni khat atan leave an la a ni.

Kumin January 1-a Delhi sorkarin motor number kawpkim leh kawpkim lo inthlan chhawk a tum chung≠changah kalpui a nih hmaa nawrh an lo huaihawt pawh sawichhuakin, CM chuan nawrh an tum thu chu tumah≠in sosrkr an hriattir lo a, an party pawhi an hre lo a ni tiin, he thilah hian politics a inrawlh nia a ngaih thu a sawi

Kejriwal-a chuan sorkar hnathawkte chu Delhi-a sorkar ṭha leh langtlang an dinnaah ṭangkai taka tel tur leh, Delhi mipuite tana theihtawpa thawk turin a fuih nghal bawk.