Brazil president thlanna neih zawh taka chak zo ta lo, senator Flavio Bolsonaro chuan US a thlen hnuah, an ram inthlana mipuite president atana an thlan dik tak chu amah zawk chu a nih thu a sawi.
Pathiannia president thlanna neihah Bolsonaro hian president ṭanglai, Luiz Inacio Lula da Silva chu a hneh zo lo a ni. Inthlan zawh hnuah Supreme Court chuan Bolsonaro hi a passport theh lut tura tiin an ram chhuahsan a khapsak zui bawk. Mahse, court thupek hi zawm duh loin a nupui fanaute nen Nilaini khan US lamah an tlanchhia a ni. Miami an thlen hnuah thuchhuah siamin an ram chhuahsan chu a thil tum a ni ngai lo tih sawiin, Brazil a tlanchhiatsan a ni lo a, Brazil ṭhatna tur zawkin a chhuahsan tih a tarlang. Brazil sorkarin a passport a cancel sak hnuah, US chuan a nupui fanaute nen visa an lo pe a ni.
X-a thuchhuah a siamah, Bolsonaro chuan mipuiten hruaitu atan an thlan dik tak chu amah chu a ni tiin, inthlan chu tihchingpen a nih thu a sawi. Inthlan result puan a nih hnuah Bolsanoro hian a chak loh chu a pawm lo a, inthlan result pawh hnawl turin a lo phut tawh bawk. Hetih lai hian a party, Liberal Party chuan inthlana Lula chak chu an pawm thu an sawi thung.
Liberal party hruaitu, Rogerio Marinho chuan Bolsonaro chu an thlawp a, politics thil avanga tlanchhia a ni tih a sawi rualin, inthlan tihchingpen nia a sawi erawh party thuchhuak a ni lo tih a sawi.
President atana thlan thar, Lula chuan ram pawn lama Bolsonaro a tlanchhia chu thil zahthlak tak a ni tiin, mahni ram chhuahsana ram danga a ruka tlanchhiate chuan thil ṭha lo, thup ngai an nei tihna a ni, a ti.
