Hong Kong-a kangmei chhuak kaihhnawihah Housing Minister a bang

Hong Kong housing minister Winnie Ho chu nikum November thlaa khawpui chhunga in kang rapthlak tak thleng chhuinaah, himna tura inkaihhruainate kenkawh ṭhat a ni lo tih hmuh chhuah a nih avangin minister a nihna aṭangin a bang.

Kum 2025 November thlaa Hong Kong hmarlama chenna in, apartment complex building pasarih kangah khan mi 168 an thi a, mi sang tel chenna nei loin an awm phah bawk. He kangmei chhuak hi kum tam tak chhunga Hong Kong khawpuia kangmei chhuak rapthlak ber a ni.

Hong Kong hotu, John Lee chuan nimin khan press conference neiin, housing minister Winnie Ho chuan he chhiatna thlengah hian mimala tih dik lo engmah nei lo mah se, mawhphurhna lain Nilaini khan banna a theh luh thu a sawi.

Kangmei chhuak chungchang chhuitu, independent committee chuan Housing Bureau-a checking unit chuan hna thawh enfiah kawngah an tih tur an ti lo niin a sawi. Lee chuan Buildings Department, Fire Services Department leh Labor Department te pawhin kangmei thlen thei thil enkawl leh vil zui kawngah an hna an tlin tawk lo niin a sawi bawk. Heng department-te hnathawh dan hi thla thum chhung enfiah a ni dawn tih a sawi.