South Korea President thar atan eptu pawl, Liberal Democratic Party candidate Lee Jae-myung chu thlan tlin a ni a, nimin vek khan National Assembly-ah President atan lak luh nghal a ni.
Thawhlehnia inthlan neihah kum 60 mi, Lee hian rorellai, conservative People Popular Party candidate Kim Moon Soo chu a hneh.
President thar Lee Jae-myung hi chhungkaw rethei tak aṭanga seilian a ni a, a chhungte pui turin school chawlhsanin factory-ah a thawk ṭhin. A hnuah law zir turin scholarship a hmu a, bar pass-in attorney a ni zui ta a ni. Politics lam a luh chilh hnuah kum riat chhung chu Seoul chhim lam, Seongnam mayor a ni a, a mayor chhung hian an rama uisa zawrhna bazar lian ber khar a ni. A hnuah kum thum chhung Gyeonggi province governor a ni leh.
Kum 2022-a president thlanna neihah khan Lee hian a lo chuh tawh bawk a, mahse Yoon Suk Yeol chu a hneh zo lo. Yoon a hneh lohna hi an ram chanchina vote inthlauhna tlem ber a ni. Kum 2024-ah a nghawngah mi pakhatin chemin a vit a, damdawi-inah zai nghal a ni. A vittu hian President a nih theih lohna tura tih hlum a tum thu a sawi.
President thar Lee chuan a hmalakna tam tak tur zingah artificial intelligence industry tih len chu a tum a nih thu sawiin, South Korea chu khawvel huapa AI industry lama hmahruaitu ram pathum zingah tel tir ngei a tum thu a tarlang. US leh Japan nen inlaichinna ṭha zawk siam turin hma a la dawn a, hei bakah an ṭhenawm North Korea pawh inbiakna neihpui thar leh a tum tih a sawi bawk.
