Kum 18 hnuah Madeleine McCann zawn hna chhunzawm

Kum 18 liam taa Algarve, Portugal-a Praia da Luz hmuna apartment complex aṭanga chin hriat loha bo, Madeleine McCann zawn hna chu Thawhlehni aṭang khan Portugal-ah thawh chhunzawmin , building hluite an enfiah leh.

Kum 2007, May 3-a a nu leh pa nena holiday hmanga kal, Madeleini hi a bo lai hian kum thum mi chauh a ni. Europe police hrang hrangten an buaipui zui a, khawvel huap pawha mi bo zawn ngaihven hlawh ber zinga mi a ni. Kum 18 hnuah Portugal leh Germany chuan a bona, Praia da Luz-a apartment leh a tir lama Germany investigator-ten a rubotu nia an rin chenna inkar, km 21 bialah enfiah hna hi Zirtawpni thleng an thawk leh dawn.

Madeleine case hi a bo tirh lam hian Portugal lamin an khawih a, kum 2020 khan German investigator-ten an la zui a ni. Hemi ṭum hian a rubotuah German mi, Christian Bruckner an ring a, mahse inhnamhnawihna a neih loh thu a sawi thung. Ani hi tunah kum 48 mi niin, 2005 khan Portugal-a American khualzin pakhat pawngsuala puh chungchangah jail-ah a tang mek a, September thla hian a chhuak ang.

Metropolitan Police chuan Madeleine case hi kum 2011 aṭang khan an la buaipui a, Operation Grange tiin vawiin thlengin an case buaipuinaah hian USD mtd 13.3 zet an seng tawh a ni.