Saudi-in Hajj hman tum mi nuai 2.7 dawn a dang

Saudi Arabia sorkar chuan Islam sakhua hun pawimawh, Hajj hman tum mi nuai 2.7 dawn chu a dang. Hei hi mipui tam lutuk tur thununna atan leh, an hmun pawimawhte himna tura tih a nih thu a sawi.

Pathianni thleng khan Hajj hmang tur hian mi mtd 1.4 vel chuan Mecca an thleng tawh a, an la thlen belh zel bawk. Nikuma Hajj hmannaah khan phalna nei loa kal eng emaw zat an awm a, mipui tam lutuk zingah khaw lum kaihhnawiha thi pawh an awm a ni.

Official-te chuan kuminah phalna nei loa lutte chu hrem an ni dawn tih sawiin, USD 5000 thleng chawi tir theih an nih dawn bakah, thawn kir leh nghal an ni ang. Khapna hian ram dang mi chauh ni lo, Saudi Arabia ram mi leh sa pawh a huam vek a ni. Hei bakah Hajj hmang tura kalte chu naupang hruai an khap bawk.

Ni nga awh, Hajj hi nimin tlai aṭang khan hman ṭan niin June 9 thleng a awh ang. Islam sakhaw zuitute chuan he hun hi an ngai pawimawh a, an hriselna leh sum dinhmunin a tlin chuan an dam chhungin Hajj hmang tura Mecca-ah vawi khat tal kal hi an tum a ni. Kumtin he hun hmanga kal mi mtd 2 chuang an tling ṭhin a, mahse pungkhawm an tam avangin innekbuaina leh chetsualna dang pawh a thleng fo ṭhin. Hei vang hian thuneitute chuan mipui himna turin khauh zawka hma lak chhoh an tum a ni.