Myanmar sipaiin kum 2021-a an ram civil sorkar paihthla a, thuneihna an hnehchhuh hnua a vawi khatna atan Myanmar sipai hotu, senior general Min Aung Hlaing leh China president Xi Jinping te chu Zirtawpni liam ta khan an inhmu.

Hruaitu pahnihte hi Myanmar sipaiten thuneihna an chhuhsak hma, kum 2020 January thla khan Naypidaw-ah an lo inhmu tawh a ni.

Min Aung Hlaing leh Xi Jinping-te hi Russia-a Victory Day an hmanpuina karlakah inhmuin, Min Aung Hlaing chuan tun hnaia an rama lirnghingin chhiatna rapthlak tak a thlenah chhawmdawl hna thawhna kawnga China-in a puihna avangin lawmthu a hrilh. Hei bakah kawng hrang hranga China puihna avanga an lawm thu a sawi bawk.

President Xi chuan Myanmar-in hma a sawn theihna turin China chuan a pui zel dawn tih sawiin, an rama China mi awmte bakah, institution leh project hrang hrangte himna chu a ngaih pawimawh sak a beisei thu a sawi.

Myanmar sipaiten thuneihna an chan hnua an ram chhunga buaina chhuak vanga thi zat hi mi 6,600 chuang an tling tawh niin Assistance Assocation for Political Prisoners chuan a sawi a, mi maktaduai telin an in leh lo an tlanchhiatsan bawk. Boruak ṭha leh muanawm a awm a, an ram economy siamṭhat a nih theihna tura inremna a awm theihna turin China hian Myanmar sipai leh helpawl hrang hrangte inbiakna a neihpui mek. China hi sipaite ralthuam supply-tu ni mah se, a ramri bul hnaia helpawlte nen pawh inzawmna ṭha tak an nei tih sawi a ni bawk.