Mexico-in Google a khing

Mexico sorkar chuan Google-in US president Donald Trump thupek tih chhuah zulzuia, an map-ah Gulf of Mexico chu Gulf of America tia a thlak avangin a khing.

Mexico president Claudia Sheinbaum chuan Google an khin thu hi sawiin, a hma pawhin Foreign Relations Ministry chuan Google hnenah Mexico ram chin tuipui chu Gulf of America tia dah lo tur an lo ngen tawh thu a sawi. Google chuan hemi chungchangah hian sawi a la nei lo.

US leh Mexico inkar tuipui hi Gulf of Mexico tih a ni ṭhin a, US president Donald Trump chuan President office a luah hnuah Gulf of America tih a nih tawh tur thu a puang. Mexico leh ram dangte pawhin Trump thupek hi an pawm lo tih an sawi. Thupek a tih chhuah hnuah Google chuan US ram chhung bik Google map-ah a hming hi Gulf of America tiin a dah a, mahse US pawn lamah erawh chuan Gulf of Mexico tih a la ni vek thung.