Palestinian Authority president Mahmoud Abbas chuan Palestinian firfiak pawl, Hamas chu an mi hren mekte chhuah turin a phut a, hei bakah an ralthuamte tung a, Gaza an thununna chu Palesitian Authority kuta hlan turin a phut bawk.
President Abbas hian Nilainia Ramallah-a meeting neihah Hamas hi na taka sawiselin, 'sons of dogs' tiin a sawi hial. Hamas-te chuan Israel-in Gaza Strip-a induna a kalpui chhunzawm zel theihna tur chhuanlam an siamsak a ni tiin, Israel an beih ṭum an mi man, tun thlenga an la hrente chu chhuah a, duhtawk tawh turin a ti. Abbas hian Gaza Strip-a thla 18 chhung indona a thlen hnua Hamas te a khak nat ber ṭum a ni.
Hetih lai hian Hamas official, Bassam Naim chuan Abbas thusawi leh ama mite ngei chungchanga ṭawngkam mawi lo tak a hmanga an dem thu a sawi thung. Hamasa hian kar liam tak ha Israel-in inkahhai puanna tura rawtna a siam thar chu an hnawl leh a ni. Israel hian kar ruk chhung inkahhai puan leh a, hemi chhung hian Hamas pawh ralthuam engmah che lek lo tur leh, an mi hren mek mi 59 zinga 10 te chhuah turin ti a ni. Mahse Hamas chuan an ralthuamte an dahthla dawn lo tih sawiin, Gaza-a indona tih tawp a nih theihna atana Israel sipaite an inhnuhdawh vek chuan an mi hrente chu an vaia chhuah an nih tur thu an sawi thung.
Abbas kaihhruai Palestinian pawl Fatah hi inthlanah lo chak tawh mah se, kum 2007 khan Hamas hian Gaza an thunun avangin West Bank lamah chauh thuneihna an chelh a ni.
Ramallah-a Palestinian Central Council meeting-ah Abbas chuan Hamas hi na taka chhalin, Gaza an thununna pawh Palestinian Authority kutah dah a, an ralthuamte pawh pe vek turin a ti a, political party anga awm tawh turin a ti a ni.
Kum 89 mi, Abbas hi kum tam tak chhung inthlan loin West Bank-a roreltu, Palestinian Authority hotuah a awm tawh a ni. Hamas lam chuan Israel thawhpuiah an puh ve thung.
