Istanbul bulah magnitude 6.2-a nain lir a nghing

Turkey rama khawpui lian ber, Istanbul khaw bulah Nilaini, an ram huna chhun dar 12:49 khan magnitude 6.2-a nain lir a nghing. Thi leh thil tih chhiat lian tham a awm hriat a ni lo a, mahse hmun him lama tlanchhiat an tumna lamah mi 151 in hliam an tuar.

Lir nghin ṭanna hi Istanbul khawthlang lam, km 80-a awm Silivri area-a Sea of Marmara kamah, lei hnuai km 6.92 vela thukah a ni. Thuneitute chuan lirnghing nawn, aftershock hi vawi 50 chuang a thleng niin an sawi bawk.

Thuneitute chuan lirnghing vang hain gas, tui leh energy supply lam a bahlah phah lo tih an sawi. Mahse Nilaini zan khan lirnghinna biala cheng mi tam tak chu inah awm ngam loin kawtthlerah an awm a ni.

Turkey chhim lamah hian kum 2023 khan ṭum hnih na takin lir a nghing tawh a, chhiatna a thlenah mi 55,000 chuang an thi a ni.

Istanbul hi Turkey rama khawpui lian ber leh mihring tamna ber niin, mi mtd 16 vel an cheng. Hei an rama mihring awm zat hmun ngaa ṭhena hmun khat an tling.