Gaza Strip hmar lamah Palestinian mi eng emaw zatin Hamas laka lungawi lohna an lantir a, indona thleng mek tih tawp thuai an duh thu leh Gaza aṭanga Hamas chhuak tura an duh thute an tarlang.

Beit Lahiya-a kawng an zawhah, Palestinian-te chuan Hamas an duh lohna thuziakte kengin an au rual bawk. Palestinian te hian Hamas duh lohna leh an laka lungawi lohna hi an lantir khat hle.Thawhlehnia lungawi lohna an lantir hi social media post ahte pawh hmuh tur a awm a ni.

Gaza hmarlam hi Israel leh Hamas indona tuar nasa ber zinga mi niin, building tam zawk chu kah chhiat an ni. He biala cheng tam tak chu ṭum eng emaw zat sawn chhuah kual an ni tawh bawk.

Kawngzawhnaa telte chuan indo chu an ning tawh takzet tih sawiin, tlanchhiatna tur hmun pawh an nei lo tih an sawi. Hamas senior official Basem Naim chuan mipuite chuan lungawi lohna lantir turin dikna an nei tih a sawi. Hemi rual hian anmahni beitute laka lungawi lohna an lan tir tel loh chhan a zawt bawk a ni.

January thlaa Israel leh Hamas ten inkahhai an puan ṭum khan Gaza hmarlama cheng, hmun danga tlanchhia tam tak chu an chenna lamah hian an kir a ni. Mahse inkahhai puan chhunzawm a nih leh tak loh avangin Israel hian beihpui a thlak leh ṭan tawh a ni. Kar liam ta aṭanga Israel-in Gaza Strip a beih lehnaah mi 700 dawn an thi tawh niin Hamas lam chuan an tarlang.