US president elect Donald Trump chuan a cabinet member turte a ruat chho zel a, Thawhlehni, November 12, 2024 khan department siam thar, Department of Government Efficiency(DOGE) enkawl turin Elon Musk leh Republican presidential candidate hlui, Vivek Ramaswamy te a ruat.
Donald Trump chuan Musk leh Ramaswamy te kaihhruainain an rama government bureaucracy chu paihbo a ni ang a, dan chuangtlaite chu ti boin, ṭul loa sum hman chhuah tam lutukte tih tlem a ni dawn a, federal agency-te pawh an nih dan tur ang takin din thar leh an ni ang, a ti.
Trump chuan hetianga siamṭhat hna an thawh hi kum 2026, July 4 ah an zo ang a, Declaration of Independence an ziah champha vawi 250-ah chuan sorkar chak leh rintlak zawk chu America ram tan an pe thei dawn tih a sawi.
Elon Musk hi electric car company Tesla, social media platform X leh rocket company SpaceX neitu niin, Ramaswamy hi pharmaceuticial company dintu a ni bawk.
Central Intelligence Agency (CIA) atan National Intelligence director hlui, John Ratcliffe ruat a ni bawk a, Ratcliffe chu an ram danpuiin mipuite dikna chanvo a pek humhim tura hlau loa beitu tur a ni dawn a ni tiin Trump chuan a sawi.
Trump hian defence secretary atan Fox News host leh military veteran advocacy group pahnih hotu hlui, kum 44 mi Pete Hegseth a ruat fel tawh bawk. Hegseth hi army veteran niin, mi hausa leh paukhauh, 'America First' ngai pawimawh tlattu a ni tiin Trump chuan a sawi."Pete kaihhruaina hnuaiah, America hmelmate chuan kan sipaite chu an chak thar leh dawn a, America chu a hnungtawlh mai mai dawn lo tih an hre dawn a ni," a ti.
Israel-a US ambassador atan Israel thlawptu langsar tak, Akansas governor hlui Mike Huckabee ruat a ni bawk.
Donald Trump-a'n a thawhpui tur a ruat tawh dangte chu White House chief of staff-ah Susi Wiles, border czar-ah Tom Homan, UN ambassador-ah Congreswoman Elise Stefanik, Environmental Protection Agency administrator atan Congresman hlui Lee Zeldin, national security adviser-ah Congressman leh amry green beret hlui Mikel Waltz niin, secretary of state tan Senator Marco Rubio a ruat dawn niin an tarlang bawk a ni.
