Myanmar sipaiten beihpui an thlaknaah mi 11 an thi

Myanmar sipaiten an ram hmarlam, Shan state-a Naungcho khua chu Thawhlehni tlai lam khan beiin, thingpui dawr an kap fuh a, mi 11 an thi niin tualchhunga helpawl chuan an tarlang.

He inbeihna hi an ram huna chawhnu dar 3 vela thleng niin, sipaite hian thingpui dawra chawl, civil mite chu an kap fuh niin Ta'ang National Liberation Army (TNLA) thupuangtu, Lway Yay Oo chuan a sawi. Civil mi midang paliin hliam tuarin, damdawi-inah hruai nghal an nih thu a sawi bawk.

Myanmar sipaite chet dan hi kumin kumtir lama China hmalaknaa inkahhai an puan bawhchhiatna a ni tih an sawi. China hian an ram chhim lam ramri bul hnaia Myanmar sipai leh helpawlte inbeihna nasa tak a thlen hnu leh, mi sing tel an tlanchhiat a ngaih avangin January thla khan helpawl pathum TNLA,Myanmar National Democratic Alliance Army (MNDAA)leh Arakan Army (AA) intelkhawm, Three Brotherhood Alliance leh sipaite chu inkahhai puanna tur inremna a lo ziahtir tawh a ni. He inremna an ziahah hian Three Brotherhood Alliance-a tel pawl pathumte chu Shan state-ah an ram lak tawh an kuta awm chhunzawm zel an remti a ni. Mahse he inremna an ziah hi bawhchhiain, helpawl kuta awm khuate hi ṭum eng emaw zat an lo bei tawh a ni.