Bangladesh-in Interpol puihna ngen

Bangladesh-a special tribunal chuan an ram prime minister hlui, paihthlak a nih hnuah himna zawnga India rama tlanchhia, Sheikh Hasina chu man a nih theihna turin Thawhlehni khan international police organisation, Interpol puihna a ngen.

Sheikh Hasina hi kum 15 zet Bangladesh-ah ro a rel hman a ni. A kaihhruai sorkar laka lungawi lohna nasa tak lantir a nih hnuah kumin August 5 khan India ramah a tlanchhia a, a thawhpui hnai leh a minister hlui ṭhenkhatten an rawn zui bawk. Hasina a tlanchhiat hnuah, August 8 khan Bangladesh ram hruaitu lailawk tan Nobel Peace prize pawh lo dawng tawh, Muhammad Yunun chu ruat a ni zui bawk.

Special tribunal-a prosecutor, BM Sultan Mahmud chuan Interpol hnenah hian Hasina leh a thurualpuite man an nih theihna tura red-corner notice ti chhuak tura an ngen thu a sawi. Yunun kaihhruai sorkar pawhin Hasina hi an ramah ngei a thubuaite a hmachhawn theihna tura India ram aṭanga hruai haw an tum thu an sawi tawh bawk.

Kum 77 mi, PM hlui Hasina leh an party hruaitute chu sorkar laka lungawi lohna lantirte dim lo leh na taka bei letah puh an ni a, kumin July-August thlaa zirlaite huaihawta sorkar duh lohna lantirnaah khan mi tam takin nunna an chan a ni. Lungawi lohna lantir chhunzawm a nih zel vangin, August 5 khan Hasina hi India ramah a tlanchhe ta a ni.